Православные молитвы

Чинопоследования Православной Церкви
Молебные пения

 

Последование молебного пения, певаемого во время бездождия

Священник начинает молебен обычным возгла́сом: "Благословен Бог наш..." Чтец: Трисвятое, "Пресвятая Троице..."; "Отче наш...." Священник: "Яко Твое есть Царство...." Чтец: "Господи, помилуй" (12 раз); "Слава, и ныне", "Приидите, поклони΄мся..." (трижды) и псалом 64-й: "Тебе подобает песнь, Боже, в Сионе...", "Слава, и ныне", "Аллилуиа" (трижды).

Диакон произносит великую ектению: "Миром Господу помолимся" до прошения "О плавающих" и присоединяет прошения о бездождии:

"О еже не помянути беззаконий и неправд людей Своих и отвратити от нас весь гнев Свой, праведно дви΄жимый на ны, и не уморити нас гладом и жаждою, Господу помолимся".

"О еже благорастворенныя возду́хи и дожди благовременныя к плодоношению милостивно послати земли и людем Своим, Господу помолимся".

"О еже во гневе Своем не погубити людей Своих и скоты΄, но повелети облако́м свыше одожди΄ти и к плодоношению оросити землю, Господу помолимся".

"О еже повелети земли прозябати плоды на веселие и пищу людей Своих и злак в службу человеком, траву же ското́м, Господу помолимся".

"О еже милостивно призрети на вопль, плач, стенания и умиленныя молитвы старых и юных, младенцев же и всех людей Своих и не погубити нас гладом грех ради наших, но пощадити от смерти души наша и препитати нас в гладе, Господу помолимся".

"О еже благоприятным быти мольбам нашым и, якоже Илию иногда послушати нас, дождем и благорастворенными возду́хи, и помиловати нас, Господу помолимся".

"О еже милостивно услышати глас молитвы нашея и избавити нас от глада, губительства, труса, потопа, огня, града, меча, нашествия иноплеменник, междоусобныя брани и всякая смертоносныя язвы, Господу помолимся".

И обычный конец ектении: "Заступи, спаси, помилуй...", "Пресвятую, Пречистую, Преблагословенную..." Священник возглашает: "Яко подобает Тебе всякая слава..."

На "Бог Господь..." тропари:

"Возду́ха растворение повелением Твоим прелага́яй, Господи, вольный дождь с благорастворенными возду́хи даруй земли, еже приносити людем Твоим плоды изобильныя и насыщати всякое животно Твоим благоволением, молитвами Богородицы и всех святых Твоих".

"Слава", глас 6-й: "Всех Творца и Зиждителя и благих Дателя, Тя, све́дуще, Господи, к Тебе припа́даем и прилежно молим: пощади, Милосерде, и прости, яко Благ, беззакония наша, и настоящаго праведнаго гнева избави рабы Своя, подая, яко Благ, жаждущей земли благоплодныя дожди, яко Един Многомилостив".

"И ныне", Богородичен, глас тойже: "Предстательство христиан..."

Псалом 50-й: "Помилуй мя, Боже, по велицей милости Твоей..."

Канон молебен к Человеколюбцу Господу в бездождие, егоже краестрочие: "Даждь дождь земли жаждущей, Спасе".

Песнь 1-я. Ирмос: "Грядите, людие, поим песнь Христу Богу..."

"Приими, Спасе, моление от недостойных наших уст и низпосли с небесе́ земли΄ дожди плодоносны, Человеколюбец сый и Многомилостив".

"Очисти ныне, Господи, грехи наша и гнев отврати, иже на ны, Спасе, наведен по правде, и подаждь с небесе́ дожди΄ во́дныя земли".

"Слава": "Приидите, человецы, восплачем к Богу всех, во умилении зовуще: прости, Человеколюбче, наша прегрешения и посли с небесе́ дожди жаждущей земли".

"И ныне", Богородичен: "Свет Тобою познахом, Богородительнице темже Тя молим и ми΄ли ся деем, моля΄щи не престай Творца и Сына Твоего послати земли дождь".

Катавасия по каждой песни: "Избави от бед...", "Спаси от бед..."

Песнь 3-я. Ирмос: "Утверди нас в Тебе, Господи..."

"Всю тварь дланию содержа́й, Господи, услыши, яко Щедр, моления рабов Твоих и низпосли воду на всю землю".

"Сый Благ и Благопременитель, яко имы΄й бездну благоутробия, не пре́зри моления наша, но посли нам мирный дождь".

"Слава": "Богатство, еже нам дал еси, ижди΄хом блудно, но яко име́яй, Господи, бездну благоутробия, и Отец Благ сый, умилися и дожди летныя подаждь земли".

"И ныне", Богородичен: "Яко иму́щая, Чистая, к Человеколюбцу Сыну Твоему благоприятное дерзновение, умоли датися земли΄ дождем плодоносным, ходатайствы Твоими".

Песнь 4-я. Ирмос: "Пою Тя, слухом бо, Господи, услы΄шах и ужасо́хся..."

"Свыше на ны при΄зри, Блаже, согре́шшыя, и даруй, Господи, милость Твою по всей земли и низпосли, молимся, богатно милости Твоя, Человеколюбче".

"На́йде на ны, Человеколюбче, согреши΄вшыя, гнев Твой, небеса заключи не дати дожде́в земли Твоей, темже молим Тя раби Твои, да не яростию Твоею, Слове, накажеши нас".

"Слава": "Растворение прелага́яй, Господи, возду́ха, повелением Твоим вольный даруй дождь нам, приносити плоды изобильныя посыла́яй, всякое животно насыщати благоволением Твоим".

"И ныне", Богородичен: "Ты Мати, Богородице, была еси Бога нашего, темже верою вси молим Тя, Владычице, яко иму́щую дерзновение: Того моли о всех нас, еже низпослати воду по всей земли".

Песнь 5-я. Ирмос: "Света Подателю и веков Творче..."

"Молитвами, Спасе, безплотных, благосердно услыши всех нас, присно моля΄щихся, и даждь дождь земли Твоей жаждущей, яко Един Человеколюбец".

"Двоенадеся΄тице учеников со страдальцы к Богу молитву о нас творите, яко да избавит нас от всякия ну́жды, гнева же и скорби".

"Слава": "Буди нам Благосе́рдый во время искушений, Господи, и прещения належащаго спаси нас и посли земли Твоей дождь волен".

"И ныне", Богородичен: "Вси Хода́таицу Тя ныне к Богу земнороднии и΄мамы яко воистину. Темже молимся: кровом Твоим, Чистая, град Твой спасай от всякаго пленения".

Песнь 6-я. Ирмос: "В бездне греховней валяяся..."

"Множество мучеников молите, яко иму́щии ко Господу дерзновение многое, ныне дождь даровати и плод изобилия по всей земли".

"Молимся, молитвами Твоих ученик, остави, остави, Господи, грехи наша, и гнев отврати от нас, и подаждь земли дождь".

"Слава": "Молим, Владыко Господи, Тебе, яко Благаго и Человеколюбца, любовию душевною: пощади нас и даруй дожди плодоносны жаждущей земли".

"И ныне", Богородичен: "Молити не престай, молимся, Сына Твоего, Пречистая Богородительнице, о нас, рабех Твоих, умирити и спасти от всякаго гнева".

Песнь 7-я. Ирмос: "Телу златому премудрыя дети не послужиша..."

"Душа́ми, Блаже, господьствующа всеми, Тебе ве́дуще, молим: пощади, прости яко Благ и Человеколюбец, и настоящаго праведнаго прещения нас избави и даруй, яко Благ, дожди жаждущей земли".

"Якоже иногда Манасси΄ю от животна меднаго покаявшагося, Спасе, избавил еси и спасл еси от смертоноснаго случая, Благоутробне, Щедре, подаждь и нам милости Твоя и сохрани нас от губительства и труса".

"Слава": "Умилосердися ныне на ны, яко Благ и Милостив, ибо согреши΄хом, беззако́нновахом и непра́вдовахом вси. Темже молим Тя со страхом: не гневом Твоим, Человеколюбче, накажи при΄чет и люди, но воду посли земли".

"И ныне", Богородичен: "Тебе вси человецы прибежище твердое и оружие необоримое, Богородительнице, ве́мы и молим раби Твои, избави прещения варварскаго люди и град Твой: от глада же и губительства, труса и всякия тли".

Песнь 8-я. Ирмос: "В пещь огненную ко отроко́м еврейским снизшедшаго..."

"Илия словом дождь держи΄т на земли и паки словом с небесе́ низводит. Темже молим Тя: того молитвами, Щедре, посли дожди во́дныя земли΄ с небесе́".

"С безплотных лики, апостолов, пророков же и мучеников, священников собор и преподобных множество, яко Создателя всех и Господа, Тебе молит, спасти поющыя Тя".

"Слава": "Якоже Иону от зверя и моря, яко Бог, избавил еси, Даниила от рова и зверей, Блаже, тако и ныне услыши рабы Твоя и избави от всякия ну́жды люди Твоя".

"И ныне", Богородичен: "Тебе, рождшую Иисуса, Богородицу на молитву ныне подвизаем, уще́дрити и спасти согрешившыя люди, и паки любовию к Тебе прибега́ющыя и превозносящыя во вся веки".

Песнь 9-я. Ирмос: "От Бога, Бога Слова, неизреченною мудростию пришедшаго..."

"Земли жаждущей, Щедре, и нам прося΄щым Твоего человеколюбия, Блаже, милостив Владыко, явися, яко Бог Вседержитель, и даруй нам, яко Благ, дожди плодоносны и спаси ду́ши наша".

"Помилуй, Милостиве, руку́ Твоею дело, прости нас, яко Благ, не яростию Твоею обличи люди, но приклони ухо Твое, и вонми молитве нашей, и подаждь земли Твоей дожди во́дныя, Господи".

"Слава": "Избави от язы΄к и варваров и всякаго супостата град Твой и вся люди и дожди нам даруй плодоносны, Щедре во изобилие всех плодов, и спасение низпосли, Человеколюбче".

"И ныне", Богородичен: "Тебе прообразу́ющи халдейская пещь, Богородице, отроки росою прохлаждаше, посреде́ пламене ликовству́ющыя; ныне же и нас, яко в пещи΄ огненней горящих сушею, дождем прохлади, Владычице, и спаси рабы Твоя Твоими молитвами, Мати Бога Человеколюбца".

Затем хор поет: "Достойно есть...." Чтец: Трисвятое, "Пресвятая Троице...", "Отче наш...." Священник: "Яко Твое есть Царство...." И поем тропари, глас 6-й: "Помилуй нас, Господи, помилуй нас...", "Слава": "Господи, помилуй нас...", "И ныне", Богородичен: "Милосердия двери отверзи нам...." Священник возглашает: "Яко Свят еси, Боже наш...." Хор: "Аминь". Чтец: "Святый Боже..." (трижды), "Слава, и ныне" - по обычаю. После Трисвятого диакон произносит: "Вонмем". Священник: "Мир всем". Чтец: "И духови твоему", диакон: "Премудрость, вонмем", чтец: "Прокимен, глас 4-й: Бразды΄ земны΄я упой и умножи жи΄та ея", стих: "В каплях ея возвеселится возсия΄ющи". Апостол из Соборного послания Иакова, зачала 56-е и 57-е; Евангелие от Матфея, зачало 65-е.

После Евангелия диакон произносит ектению "Помилуй нас, Боже..." с особыми прошениями:

"Не хотя΄й смерти грешнаго, но ожида́яй обращения и покаяния его, услыши нас, Тебе молящихся".

"Возводя΄й о́блаки от последних земли΄, повели тем подати дождь мирен на ню, молим Ти ся".

"Призываяй воду морскую и изливаяй ю на лице всея земли΄, низпосли΄ благословение Твое на ны, моля΄щыяся Тебе".

"Одева́яй небо облаки и готовля΄яй земли дождь, низпосли нам милости Твоя, моля΄щымся Тебе".

"Прозяба́яй траву скотом и злак на службу человеком, спаси человеки, Тебе молящяеся, и скоты΄".

"Дождь волен и тучу мирную подаждь земли и спаси всяческая, Человеколюбче, и нам, моля΄щымся Тебе".

"Низпосли дожди Твоя на требующая и просящая места́, Человеколюбче, нам, моля΄щымся Тебе".

"Щедре и Милостиве, ущедри и возвесели нас, Человеколюбче, молящихся Тебе".

"Услыши ны, Боже, яко бла́га милость Твоя, и помилуй ны, Твоим благоутробием, молящихся Тебе".

Священник возглашает: "Яко Милостив и Человеколюбец Бог еси..." и сразу: "Еще молимся, о еже сохранитися граду сему и всякому граду и стране...." Хор: "Господи, помилуй" (40 раз). Священник произносит возглас: "Услыши ны, Боже, Спасителю наш...." Хор: "Аминь".

Затем священник читает семь молитв о бездождии (седьмая молитва также и о изменении ветров), творение Ка́ллиста, патриарха Константино́польского.

 

Молитва первая

Господу помолимся!

Владыко Господи Боже наш, послу́шавый Илию Фесви΄тянина ревности ради к Тебе и во время посылаемому земли дождю удержатися повеле́вый, таже паки молитвою его дождь плодоносный ей даровавый! Сам Владыко всех, от Сама́го Твоего благоутробия умоляемь, дождь волен даждь наследию Твоему и, согрешенная нами презре́в, дожди Твоя низпосли на требующая и просящая места́: возвесели лице земли, нищих ради людей Твоих, и младенцев, и скотов и иных всех, зане́ к Тебе чают, еже дати пищу им во бла́го время. Ты бо еси Бог наш, Бог еже миловати и спасати, и Тебе славу возсылаем, Отцу и Сыну и Святому Духу, ныне и присно, и во веки веков, аминь.

 

Молитва вторая

Господу помолимся!

Господи Боже Вседержителю, возводяй облаки от последних земли, молнии в дождь сотворивый, изводя΄й ветры от сокровищ Своих, призыва́яй воду морскую и пролива́яй ю на лице всея земли! Тебе молимся и Тебе ми΄ли ся де́ем, испове́дающе грехи наша и от Тебе богатыя милости прося΄ще: запове́ждь облако́м еже одождити дождь, уще́дри вся земная Твоя: умилосердися на старцы, и ю΄ноты, и младенцы, ссущыя сосцы, на рабы Твоя и на рабыни, сы΄ны и дщери и на вся скоты΄ земли, да изведет нам хлеб в снедь и злак ското́м. Приими моления всех людей Твоих и не отрини воздыхания убогих, ниже́ яростию Твоею обличиши нас, ниже́ гневом Твоим накажеши нас, ниже́ да растли΄ши гладом и жаждею люди Твоя: всех бо очи на Тя уповают, прияти от Тебе пищу во бла́го время. На Тя надеемся и разве Тебе ина́го не ве́мы, от Тебе богатыя милости ожидаем; яко Благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

 

Молитва третия

Господи Боже наш, ве́мы, яко недостойни есмы΄ Твоих щедрот, и несмы΄ достойни возвести очи наши, и зрети на небо, и стати пред Тобою, и прошения наша глаголати к Тебе: кое бо добро́ сотворихом, да и прошения получи΄м? Ибо Твоея ради безмерныя благости от небытия΄ нас во еже быти привед, образом Твоим поче́л еси и тварь всю нам покорил еси. Но мы толи΄ко облагоде́тельствовани бывше, якоже врази΄ предста́вихомся, и Тебе, Благодетеля, заповеди презре́хом, и житие порочно и мысль скверну и нечисту стяжа́хом, и не то́чию Твою любовь отверго́хом, но и якоже зверие друг на друга носимся и плоти друг друга снедаем лихоимственными образы и неправедным произволением нашим: како убо достойни есмы΄ Твоих благодетельств восприяти? Ты бо праведен, мы неправедни: Ты любиши, мы враждуем: Ты Благоутробен, мы неблагоутробни: Ты Благодетель, мы хищницы. Кое общение к Тебе и΄мамы, да и Твоих благих приобщимся? Исповедуем правду Твою, познаваем осуждение наше, проповедуем благодеяния Твоя, тьмам смертей повинни есмы΄. Се, под Твоею действительною и вся содержащею рукою пребываем: удобно есть Твоей всесильной руце́ яко во мгновении ока погубити нас: и ели΄ко от нашего наме́рения и жития праведно есть нам пагубе предатися, Праведнейший Судие, но Твоей непобедимей благости и неизреченней благосты΄ни несть всякое достойно, Человеколюбнейший Владыко. Сего ради на неизсле́димое Твое милосердие и непамятозлобную Твою утробу дерзающе, приступаем к Тебе, Благодетелю, неразумнии и неблагодарнии, не предаждь нас грех ради наших в ру́це сухости, ниже́ беззаконий ради наших сокрушиши нас узами глада, но благости ради Твоея подаждь земли, юже определил еси, и наследию Твоему дождь волен и исполни недра земная живородными Твоими вода́ми: се бо предлежит сия, якоже мати изсуше́ны иму́щая сосцы. Якоже бо о́ныя сосцы, млека́ лишающеся, смерть приносят младенцу: сице и земля, бразды своя непричастны влажности иму́щи, увядение творит злаку, и растление рождениям своим приносит, и губительство нам претительное и смерть, ибо от сухости зной, аки некая разжигающая огне́вица, прозябения увяди΄вый, погибель провозвещает рождением ея: но милостию Твоею посети ю, и водны΄ми облаки воздух благораствори, и богатым Твоим дождем землю ороси, и прозябения ея оживи, и возве́янием добрейших ве́тров плоды целы и полны сотвори и умножи я (их) благоутробием Твоим, теми бо определил еси телесный живот содержати. Аще бо не Ты вольными Твоими дожди да́си благость, земля наша не даст плода своего, но множества ради щедрот Твоих услыши моление нас, недостойных рабов Твоих, Ты бо еси Источник милости и благих Подателю, и Тебе славу возсылаем, со Безначальным Твоим Отцем, и с Пресвятым, и Благим, и Животворящим Твоим Духом, ныне и присно, и во веки веков. Аминь.

 

Молитва четвертая

Господи, Господи, пророком Твоим Илиею разреши΄вый сухость, и течением дожде́в лице земли΄ одождивый, и обилием плодов напита́вый люди Твоя богатно! Сам и ныне естественною Твоею благосты΄нею умоляемь, даруй земли дожди мирны во плодоносие летных плодов. Ты бо еси во́ды в места́ их устро́ивый и землю ими покрываемую видиму сотворивый. Ты еси повелевый ей различныя изращати плоды в наслаждение наше. Ты еси греха ради, иже при Но́и человеков, источники бездн разве́рзый, и хля΄би отве́рзый небесныя, и лице земли наводнивый во истребление всякия плоти. Ты еси водами покрываяй превы΄спренняя Твоя. Ты еси о́блаки возвыша́яй и сим повелева́яй дождевныя испущати капли. Ты еси возводя΄й воду морскую и излива́яй на лице земли΄. Ты еси дожди определи΄вый, и дожди вольныя отлучи΄вый, и реки вод наполня΄яй, и напоя΄яй землю, и упоева́яй бразды΄ ея, во умножение красных ея плодов. Ты еси разделивый море, и реку́ проходиму соде́лавый, и воду из ка́мене источивый, и горесть водну́ю в сладость преложи΄вый. Весть водно́е естество своего Творца, знает своего Владыку, не не весть должное свое служение. Аще у́зрит Тебе, Владыку, гневающагося на ны или безмерно движимо, погибель соде́ловает или спря΄таемо удержавается, и сухость вмещение емлет, и пламеновидный возду́х бывает, и земная прозябения увядают, и мы в ру́це беды΄ впа́даем. Аще же паки видит Тебе, Человеколюбца Бога, благоуветлива и благопременительна, дожди уготовляет, и тучи на земли΄ νизносятся, и возду́х благодыщущий бывает, и земля, Твое повеление услышавши, изобильныя плоды от своих боков прозябает. Тебе убо, Творца и Создателя всех, молим, глаголюще: помилуй нас, Господи, помилуй нас: помяни, яко дела́ руку́ Твоею есмы΄, вонми неможению естества нашего, яко Ты сотворил еси нас. Виждь птиц стенание, ското́в вопиение, младенческий плач, юнош вопль, старых окаянство, сирот лишение, вдовиц уединение, убогих недостаточество и всех людей Твоих молебный глас, и посети землю, и упой ю тучными дожди: мокроты΄ бо лишающися, своим убо прозябением увядение, человеком же и ското́м пагубою претит. Водою пагубу навед иногда, помянул еси Ноя, носимаго в ковче́зе, от безмерных вод оных: помянул же еси его, и птицы, и скоты, и звери, и ползающая, и навел еси дух на землю, и преста вода: и Ноя, и с ним животная, якоже семя, соблюл еси, в бытие втораго мира. И ныне содержащею сухостию возду́х, гладом преща́яй и смертию, помяни уповающыя на Тя люди, помяни и птицы, помяни и скоты, и дух росы наведи, и сухость да престанет, и се́мена земли΄ сотвори в воспитание человеков же и животных, и вся паки еже от Тебе Промысла сподоби. Ты бо еси прозяба́яй траву скотом, злак службе человеков, и Ты еси изводя΄й хлеб от земли и вино источа́яй и елеем умаща́яй человеческая ли΄ца, яко да подаваемым от Тебе благи΄м во изобилии причаща́ющеся, в веселии сердца прославим Твою благость, Отца и Сына и Святаго Духа, ныне и присно, и во веки веков. Аминь.

 

Молитва пятая

Владыко Господи, Иисусе Христе, Боже наш, глаголом Своим все от небытия приведы΄й, персть взе́мый от земли и создавый человека, и душею словесною, и образом Твоим почты΄й того и реки΄й: раститеся и множитеся и наполняйте землю, дая΄й скотом пищу и птенцем врановым. Иже и в велицем и спасительном плотию пришествии Твоем, прежде убо седмию΄, потом же пятию΄ хле́бы, тысящы насытил еси многия! Сам, Всеблагий Владыко, и Твоя люди сия призывающыя Пресвятое Твое Имя, Твоею вседетельною и великодарною десницею богатно препитай. При΄зри, Господи, на убогия люди Твоя, отверза́яй руку Твою и насыща́яй всякое животно благоволения, ущедри всех нас милостивно: Ты бо, Владыко Человеколюбче, Един еси Отец всех нас, и к Тебе единому очи возводим, яко отдое́ное на матерь свою. Твое есть слово, Преблагий Владыко: проси΄те, и дастся вам, ищите, и обрящете. Подаждь убо прося΄щым ныне, Владыко, с духовною пищею и нуждную плоти, и препитай алчущыя Твоя люди, дожди временны и благорастворение возду́хов и плодов различных изобилие земли даруй: в не́мощи и губительстве, и огневице, и неду́зех различных бедствующих посети. Избави, Господи, Имя Твое призывающий сей град, и всякий град, и страну от глада, губительства, труса, потопа, огня, меча и убийства, да́руяй нам милости Твоя, благодатию Безначальнаго и Единосущнаго Твоего Отца, и Пресвятаго и Единочестнаго Твоего Духа: молитвами и моленьми Преблагословенныя Богородицы, богоглаголивых Твоих апостолов и всех святых Твоих. Аминь.

 

Молитва шестая

Господи Иисусе Христе Боже наш, Иже нашего ради спасения изво́ливый плоть носити, да прославиши чу́дно словесное естество неизреченным Твоим благоутробием и благостию и Иже во истинном познании обращающыяся из глубины΄ греховныя простити обеща́яй, егда бо к Тебе воззря΄т рабиим образом и истинным исполнением Божественных Твоих заповедей, тогда и ти΄и со дерзновением возмогут Тя, Бога Милостиваго и Благосердаго, имети. Ныне убо остави вся беззакония наша, и приклони к нам ухо Твое, и услыши ны, смиренныя и грешныя, якоже иногда Фесви΄тянина Илию услышал еси, якоже глаголом единым связати небо к целомудрию непокоривых оных людей: таже тем паки обычное человеколюбие употребивый, облако́м повелевый, землю всю напоил еси водою благою! Сице и ныне паки моленьми того Твоего угодника и теплыми молитвами пре́зри беззакония наша и грехи, и приими молитвы наша, и услыши нас в час сей тепле молящих Ти ся, и разреши сухость сию земную, испове́данием и воплем людей Твоих, и низпосли на ны дождь благий, яко да насытимся воды, и земля наша даст плоды во время благопотребно в пищу нашу и тех яве безсловесных животных. Ей, Господи, Боже наш, услыши ны, грешныя и недостойныя рабы Твоя, и не пре́зри моления наша, ниже́ да победит беззаконие наше милость Твою, но приклони, Господи, ухо Твое и услыши ны. Виждь сокрушение и умилосердися; виждь от святаго Твоего жилища, виждь воздыхание убогих; виждь незрелый возраст младенцев, зе́льнейшею жаждею изнуряемый; виждь незлобивых младенцев озлобление; виждь утробы матерни, виждь сосцы изсушаемыя убиенных младенцев; виждь состаревшыяся и юношы, якоже вериги в руки беззаконных изда́нныя, и пре́зри убо согрешения наша, яже в ве́дении и не в ведении, яже во уме и помышлении, и не отрини нас до конца. Не бо воды΄ единыя жаждею таем, но и тьмами иных зол, грех наших ради: и к Тебе зрим, да налиется на нас дождь зре́лейший же и изобильнейший, да и праведный Твой гнев уставиши лютаго сего пленения. Обоя΄ у́бо просим и молимся Тебе, Человеколюбче, да кладези и се́ла наша наполниши воды, и душевныя наша нивы в сытость напоиши, и исполниши Твоея благости: и кладязи, си΄речь сердца́ наша, веселием и неизреченною радостию и радованием упои΄ψи, уставиши належащее на нас нестерпимое стремление безбожных ага́рян1. Ты бо еси Свободитель душ и телес наших, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

 

Молитва седмая

Господу помолимся!

Благий Человеколюбче, Господи, Иже тварь единым словом соде́лавый и из нея человека создавый, последи΄ же неизреченным человеколюбием падшаго сего и раба греху бывша восприе́мый и освятивый, яко да не погибнет до конца дело руку́ Твоею, давый же сему и Своя заповеди в память Твоего пришествия, и Твоих повелений, и Божественнаго вочеловечения! Темже трудился еси, и подвизался еси, и взалкал, и вжажда́л еси, исполнивый вся нас ради, яко ле́по, человеческая: вше́дый же в корабль, и по морю ходи΄вый, и во́лны ди΄вия и зе́льности ве́тров обузда́вый, и вся пострадати претерпевый, даже до Креста и Смерти: да в немже пострадал еси и искусился еси, поможеши нам, немощству́ющым. Сам и ныне, Царю Святый, еже наше неможение человеколюбно восприе́мый, умилосердися о нас, обуреваемых зело́ и нужд1 скудостию изнуряемых: подаждь нам Твою благость, упой землю нашу водою чистою, к плодоношению ея, полезныя нам возду́хи даруй. И якоже иногда ученики Твоя погружаемыя спасл еси от моря и зельности ве́тров, такоже и ныне спаси ны от содержащаго нас обстояния. Устави2 и ныне морское свирепство, укроти сопротивныя ду́хи Твоим повелением Божественным, даждь нам тишину и упокоение от скорбных. Ей Господи Иисусе Христе, Боже наш, виждь и при΄зри от святаго жилища Твоего на виноград сей, и соверши и? (его), егоже насади΄ δесница Твоя, и даждь Духа праваго к пременению находящих на нас напастей, молитвами рождшия Тя Матере и всех святых Твоих. Аминь.

Отпу́ст обычный.

Источник: Михаил Чернов vsemolitva.ru



© 2012 Православные молитвы. Все права защищены. Разрешается републикация материалов с обязательным указанием ссылки Православные молитвы